ਤਲਵੰਡੀ ਸਾਬੋ 24 ਸਤੰਬਰ (ਅੰਮ੍ਰਿਤ ਮਲਕਾਣਾ ) ਨਸ਼ਾ ਅੱਜ ਪੰਜਾਬ ਦੀ ਸਭ ਤੋਂ ਵੱਡੀ ਸਮੱਸਿਆ ਬਣ ਗਿਆ ਹੈ ਪਰ ਨਸ਼ੇ ਨੂੰ ਠੱਲ੍ਹ ਪਾਉਣ ਦੇ ਮਾਮਲੇ ‘ਤੇ ਜਿੱਥੇ ਪਿਛਲੇ ਸਾਢੇ ਚਾਰ ਸਾਲ ਪੰਜਾਬ ਦੀ ‘ਆਪ’ ਸਰਕਾਰ ਨੇ ਅੱਖਾਂ ਮੀਟੀ ਰੱਖੀਆਂ ਉੱਥੇ ਕੇਂਦਰ ਦੀ ਭਾਜਪਾ ਸਰਕਾਰ ਨੇ ਵੀ ਬਿਆਨਬਾਜ਼ੀ ਤੋਂ ਵੱਧ ਕੁਝ ਨਹੀ ਕੀਤਾ ਤੇ ਹੁਣ ਦੋਵੇਂ ਸਰਕਾਰਾਂ ਗੋਂਗਲੂਆਂ ਤੋਂ ਮਿੱਟੀ ਝਾੜ ਰਹੀਆਂ ਹਨ।ਉਕਤ ਵਿਚਾਰਾਂ ਦਾ ਪ੍ਰਗਟਾਵਾ ਹਲਕੇ ਅੰਦਰ ਕਾਂਗਰਸ ਪਾਰਟੀ ਵੱਲੋਂ ਸਰਗਰਮ ਨੌਜਵਾਨ ਆਗੂ ਗੁਰਬਾਜ਼ ਸਿੰਘ ਸਿੱਧੂ ਨੇ ਗੱਲਬਾਤ ਦੌਰਾਨ ਕੀਤਾ।
ਪਿੰਡਾਂ ‘ਚ ਲੋਕਾਂ ਅਤੇ ਕਾਂਗਰਸੀ ਵਰਕਰਾਂ ਦੇ ਨਿੱਜੀ ਪ੍ਰੋਗਰਾਮਾਂ ‘ਚ ਹਾਜ਼ਰੀਆਂ ਭਰਨ ਤੇ ਲੋਕ ਮੁਸ਼ਕਿਲਾਂ ਸੁਣਨ ਉਪਰੰਤ ਗੱਲਬਾਤ ਕਰਦਿਆਂ ਗੁਰਬਾਜ਼ ਸਿੰਘ ਸਿੱਧੂ ਨੇ ਕਿਹਾ ਕਿ ਪੰਜਾਬ ਦੀ ਸੱਤਾ ‘ਤੇ ਕਾਬਿਜ਼ ਮੌਜੂਦਾ ਧਿਰ ਨੇ ਨਸ਼ੇ ਦੇ ਮਾਮਲੇ ਨੂੰ ਕਦੇ ਗੰਭੀਰਤਾ ਨਾਲ ਲਿਆ ਹੀ ਨਹੀ ਸਗੋਂ ਦੂਜੀਆਂ ਧਿਰਾਂ ‘ਚ ਨੁਕਸ ਕੱਢਦਿਆਂ ਹੀ ਸਾਢੇ ਚਾਰ ਸਾਲ ਲੰਘਾ ਦਿੱਤੇ ਤੇ ਆਲਮ ਇਹ ਬਣ ਗਿਆ ਕਿ ਸਰਕਾਰ ਚਲਾ ਰਹੇ ਆਗੂਆਂ ਦੇ ਆਪਣੇ ਪਿੰਡਾਂ ‘ਚ ਨਸ਼ਿਆਂ ਦਾ ਸੇਕ ਵੱਡੀ ਪੱਧਰ ਤੇ ਮਹਿਸੂਸ ਕੀਤਾ ਜਾ ਰਿਹਾ ਹੈ ਪਰ ਨੌਜਵਾਨਾਂ ਦੇ ਮਾਪਿਆਂ ਨੂੰ ਸਮਝ ਹੀ ਨਹੀ ਆ ਰਹੀ ਕਿ ਉਹ ਫ਼ਰਿਆਦ ਕਿੱਥੇ ਕਰਨ।ਸਿੱਧੂ ਨੇ ਕਿਹਾ ਕਿ ਕੇਂਦਰ ਦੀ ਸੱਤਾ ਤੇ ਕਾਬਜ਼ ਭਾਜਪਾ ਵੱਲੋਂ ਵੀ ਹੁਣ ਨਸ਼ਿਆਂ ਨੂੰ ਮੁੱਦਾ ਬਣਾ ਕੇ ਸੂਬੇ ਦੀ ਸੱਤਾ ਹਾਸਿਲ ਕਰਨ ਦਾ ਸੁਪਨਾ ਦੇਖਿਆ ਜਾ ਰਿਹਾ ਹੈ ਪਰ ਇਹ ਵੀ ਨਸ਼ਾ ਰੋਕਣ ਲਈ ਸੁਹਿਰਦ ਨਹੀ ਜਾਪਦੇ ਕਿਉਂਕਿ ਅਗਰ ਹੁੰਦੇ ਤਾਂ ਮੌਜੂਦਾ ਸਮੇਂ ਵੀ ਨਸ਼ਾ ਰੋਕਣਾ ਕੇਂਦਰ ਲਈ ਕੋਈ ਬਹੁਤੀ ਵੱਡੀ ਗੱਲ ਨਹੀ।ਉਨਾਂ ਅਪੀਲ ਕੀਤੀ ਕਿ ਸਰਕਾਰਾਂ ਨਸ਼ੇ ਦਾ ਠੋਸ ਹੱਲ ਕੱਢਣ ਲਈ ਸੰਜੀਦਾ ਹੋਣ ਸਿਰਫ ਬਿਆਨਬਾਜ਼ੀ ਨਾਲ ਬੁੱਤਾ ਨਾ ਸਾਰਣ।
ਇਸ ਮੌਕੇ ਉਨਾਂ ਨਾਲ ਮਨਜੀਤ ਸਿੰਘ ਲਾਲੇਆਣਾ ਹਲਕਾ ਪ੍ਰਧਾਨ ਜੱਟਮਹਾਂ ਸਭਾ,ਸੁਖਬੀਰ ਸਿੰਘ ਚੱਠਾ,ਕ੍ਰਿਸ਼ਨ ਯਾਦਵ,ਹੈਪੀ ਬਹਿਮਣ,ਗੁਰਾਦਿੱਤਾ ਸੀਂਗੋ,ਹਰਜਿੰਦਰ ਸਿੰਘ ਜਿੰਦਾ ਜੀਵਨ ਸਿੰਘ ਵਾਲਾ,ਪ੍ਰਿੰਸ ਭੁੱਲਰ ਫੁੱਲੋਖਾਰੀ,ਰਾਮ ਫੁੱਲੋਖਾਰੀ,ਦਰਸ਼ਨ ਗਿੱਲ,ਕੁਲਦੀਪ ਰਾਇਲ ਆਦਿ ਆਗੂ ਮੌਜੂਦ ਸਨ।
