ਸਿੱਖਿਆ, ਸਾਹਸ, ਕੁਦਰਤੀ ਸੁੰਦਰਤਾ ਅਤੇ ਮਨੋਰੰਜਨ ਦਾ ਬਣਿਆ ਅਨੋਖਾ ਸੁਮੇਲ
ਸੰਗਤ ਮੰਡੀ, 8 ਸਤੰਬਰ (ਚਰਨਜੀਤ ਮਛਾਣਾ )
ਸੇਂਟ ਜ਼ੇਵੀਅਰਜ਼ ਈ-ਸਕੂਲ, ਸੰਗਤ ਵੱਲੋਂ ਵਿਦਿਆਰਥੀਆਂ ਲਈ 3 ਤੋਂ 6 ਸਤੰਬਰ 2026 ਤੱਕ ਮਨਾਲੀ ਦਾ ਚਾਰ ਰੋਜ਼ਾ ਵਿਦਿਅਕ ਅਤੇ ਮਨੋਰੰਜਕ ਟੂਰ ਸਫਲਤਾਪੂਰਵਕ ਆਯੋਜਿਤ ਕੀਤਾ ਗਿਆ। ਇਸ ਟੂਰ ਨੇ ਵਿਦਿਆਰਥੀਆਂ ਨੂੰ ਕਿਤਾਬੀ ਗਿਆਨ ਦੇ ਨਾਲ-ਨਾਲ ਕੁਦਰਤ, ਇਤਿਹਾਸ, ਸੱਭਿਆਚਾਰ, ਸਾਹਸ ਅਤੇ ਵਿਹਾਰਕ ਸਿੱਖਿਆ ਨਾਲ ਜੋੜਨ ਦਾ ਵਿਲੱਖਣ ਮੌਕਾ ਪ੍ਰਦਾਨ ਕੀਤਾ।ਟੂਰ ਦੌਰਾਨ ਵਿਦਿਆਰਥੀਆਂ ਨੇ ਹਿਡਿੰਬਾ ਦੇਵੀ ਮੰਦਰ, ਕਲੱਬ ਹਾਊਸ, ਪਰਸ਼ਾ ਝਰਨਾ, ਸੋਲੰਗ ਵੈਲੀ, ਸਿਸੂ, ਸਨੋ ਪੁਆਇੰਟ ਅਤੇ ਅਟਲ ਟਨਲ ਸਮੇਤ ਕਈ ਪ੍ਰਮੁੱਖ ਸਥਾਨਾਂ ਦਾ ਦੌਰਾ ਕੀਤਾ। ਹਿਮਾਲਿਆ ਦੀਆਂ ਬਰਫ਼ੀਲੀਆਂ ਚੋਟੀਆਂ, ਹਰੇ-ਭਰੇ ਪਹਾੜ, ਝਰਨਿਆਂ ਦੀ ਮਨਮੋਹਕ ਸੁੰਦਰਤਾ ਅਤੇ ਕੁਦਰਤ ਦੇ ਅਦਭੁੱਤ ਨਜ਼ਾਰਿਆਂ ਨੇ ਵਿਦਿਆਰਥੀਆਂ ਨੂੰ ਮੋਹਿਤ ਕਰ ਦਿੱਤਾ। ਇਸ ਦੌਰਾਨ ਉਨ੍ਹਾਂ ਨੇ ਹਿਮਾਚਲ ਪ੍ਰਦੇਸ਼ ਦੀ ਭੂਗੋਲਿਕ, ਇਤਿਹਾਸਕ ਅਤੇ ਸੱਭਿਆਚਾਰਕ ਵਿਭਿੰਨਤਾ ਨੂੰ ਨੇੜਿਓਂ ਜਾਣਨ ਦਾ ਮੌਕਾ ਹਾਸਲ ਕੀਤਾ।ਟੂਰ ਨੂੰ ਹੋਰ ਯਾਦਗਾਰ ਬਣਾਉਣ ਲਈ ਸਾਹਸਿਕ ਗਤੀਵਿਧੀਆਂ, ਸੈਰ-ਸਪਾਟਾ, ਸਥਾਨਕ ਖਰੀਦਦਾਰੀ, ਸੰਗੀਤ ਵਰਗੀਆਂ ਗਤੀਵਿਧੀਆਂ ਵੀ ਕਰਵਾਈਆਂ ਗਈਆਂ। ਇਨ੍ਹਾਂ ਗਤੀਵਿਧੀਆਂ ਨੇ ਵਿਦਿਆਰਥੀਆਂ ਵਿੱਚ ਟੀਮ ਭਾਵਨਾ, ਸਹਿਯੋਗ, ਆਪਸੀ ਸਾਂਝ ਅਤੇ ਆਤਮ-ਵਿਸ਼ਵਾਸ ਨੂੰ ਹੋਰ ਮਜ਼ਬੂਤ ਕੀਤਾ।ਇਸ ਟੂਰ ਦੀ ਇੱਕ ਵਿਸ਼ੇਸ਼ ਖਿੱਚ 5 ਸਤੰਬਰ ਨੂੰ ਸਿਸੂ ਦੀਆਂ ਖੂਬਸੂਰਤ ਪਹਾੜੀ ਵਾਦੀਆਂ ਵਿੱਚ ਮਨਾਇਆ ਗਿਆ ਅਧਿਆਪਕ ਦਿਵਸ ਰਿਹਾ। ਅਧਿਆਪਕਾਂ ਦੇ ਸਨਮਾਨ ਅਤੇ ਉਨ੍ਹਾਂ ਦੇ ਸਮਰਪਣ ਨੂੰ ਸਮਰਪਿਤ ਇੱਕ ਖੁਸ਼ਗਵਾਰ ਕੇਕ ਕੱਟਣ ਦੀ ਰਸਮ ਆਯੋਜਿਤ ਕੀਤੀ ਗਈ। ਹਿਮਾਲਿਆ ਦੀਆਂ ਵਿਸ਼ਾਲ ਪਹਾੜੀ ਚੋਟੀਆਂ ਦੇ ਦਰਮਿਆਨ ਹੋਇਆ ਇਹ ਜਸ਼ਨ ਅਧਿਆਪਕਾਂ ਅਤੇ ਵਿਦਿਆਰਥੀਆਂ ਲਈ ਇੱਕ ਬੇਹੱਦ ਖੂਬਸੂਰਤ ਅਤੇ ਯਾਦਗਾਰ ਪਲ ਬਣ ਗਿਆ।
ਸਮੁੱਚੇ ਟੂਰ ਦੇ ਪ੍ਰਬੰਧ ਮਾਣਯੋਗ ਚੇਅਰਮੈਨ ਸ੍ਰੀ ਅਮਿਤ ਗੁਪਤਾ ਜੀ ਦੀ ਅਗਵਾਈ ਅਤੇ ਸਹਿਯੋਗ ਹੇਠ ਕੀਤੇ ਗਏ। ਉਨ੍ਹਾਂ ਵੱਲੋਂ ਵਿਦਿਆਰਥੀਆਂ ਦੀ ਸੁਰੱਖਿਆ, ਸੁਵਿਧਾ ਅਤੇ ਟੂਰ ਦੇ ਸੁਚੱਜੇ ਪ੍ਰਬੰਧਾਂ ਨੂੰ ਵਿਸ਼ੇਸ਼ ਤਰਜੀਹ ਦਿੱਤੀ ਗਈ। ਸਕੂਲ ਦੇ ਮਾਣਯੋਗ ਸਲਾਹਕਾਰ ਮਾਨਯੋਗ ਲਵਿਸ਼ ਗੁਪਤਾ (ਐਡਵੋਕੇਟ) ਨੇ ਵੀ ਸਮੁੱਚੇ ਪ੍ਰਬੰਧਾਂ ਦੀ ਨਿਗਰਾਨੀ ਕਰਦਿਆਂ ਟੂਰ ਨੂੰ ਸੁਚਾਰੂ ਅਤੇ ਆਰਾਮਦਾਇਕ ਢੰਗ ਨਾਲ ਨੇਪਰੇ ਚਾੜ੍ਹਨ ਵਿੱਚ ਮਹੱਤਵਪੂਰਨ ਭੂਮਿਕਾ ਨਿਭਾਈ।ਵਿਦਿਆਰਥੀਆਂ ਦੇ ਰਹਿਣ-ਸਹਿਣ, ਪੌਸ਼ਟਿਕ ਭੋਜਨ, ਪੀਣ ਵਾਲੇ ਪਾਣੀ, ਆਵਾਜਾਈ ਅਤੇ ਸੁਰੱਖਿਆ ਸਮੇਤ ਉਨ੍ਹਾਂ ਦੀ ਸਮੁੱਚੀ ਭਲਾਈ ਦਾ ਵਿਸ਼ੇਸ਼ ਧਿਆਨ ਰੱਖਿਆ ਗਿਆ। ਸਕੂਲ ਦੀ ਪ੍ਰਿੰਸੀਪਲ ਮੈਡਮ ਪ੍ਰਾਚੀ ਸ਼ਰਮਾ ਵੱਲੋਂ ਵੀ ਪੂਰੇ ਟੂਰ ਦੌਰਾਨ ਆਪਣਾ ਕੀਮਤੀ ਸਹਿਯੋਗ ਅਤੇ ਮਾਰਗਦਰਸ਼ਨ ਪ੍ਰਦਾਨ ਕੀਤਾ ਗਿਆ।
6 ਸਤੰਬਰ ਨੂੰ ਵਿਦਿਆਰਥੀ ਖੁਸ਼ੀ ਭਰੇ ਚਿਹਰਿਆਂ ਅਤੇ ਮਨ ਵਿੱਚ ਅਣਗਿਣਤ ਯਾਦਾਂ ਸਾਂਭ ਕੇ ਸਕੂਲ ਵਾਪਸ ਪਰਤੇ। ਇਹ ਟੂਰ ਵਿਦਿਆਰਥੀਆਂ ਲਈ ਸਿਰਫ਼ ਇੱਕ ਸੈਰ-ਸਪਾਟਾ ਨਹੀਂ, ਸਗੋਂ ਸਿੱਖਣ, ਕੁਦਰਤ ਨੂੰ ਮਹਿਸੂਸ ਕਰਨ, ਨਵੀਆਂ ਚੁਣੌਤੀਆਂ ਦਾ ਸਾਹਮਣਾ ਕਰਨ ਅਤੇ ਜੀਵਨ ਭਰ ਲਈ ਯਾਦਗਾਰ ਪਲ ਇਕੱਠੇ ਕਰਨ ਦਾ ਇੱਕ ਅਨਮੋਲ ਅਨੁਭਵ ਸਾਬਤ ਹੋਇਆ।ਸੇਂਟ ਜ਼ੇਵੀਅਰਜ਼ ਈ-ਸਕੂਲ, ਸੰਗਤ ਦਾ ਇਹ ਉਪਰਾਲਾ ਸਕੂਲ ਦੀ ਉਸ ਵਚਨਬੱਧਤਾ ਨੂੰ ਦਰਸਾਉਂਦਾ ਹੈ, ਜਿਸ ਤਹਿਤ ਵਿਦਿਆਰਥੀਆਂ ਨੂੰ ਸਰਵਪੱਖੀ ਵਿਕਾਸ, ਅਨੁਭਵਾਤਮਕ ਸਿੱਖਿਆ ਅਤੇ ਜੀਵਨ-ਮੁੱਲਾਂ ਨਾਲ ਜੋੜਨ ਲਈ ਕਲਾਸਰੂਮ ਤੋਂ ਬਾਹਰ ਵੀ ਸਿੱਖਣ ਦੇ ਮੌਕੇ ਪ੍ਰਦਾਨ ਕੀਤੇ ਜਾਂਦੇ ਹਨ।
